మౌనం ఒక మంత్రం

ఆయుర్విత్తం గృహచ్ఛిద్రం
*మంత్రౌషథ   సమాగమాః *
దాన మానా వమానాశ్చ
నవ గోప్యాః  మనీషిభిః
                     
మనిషి అంటే సామాన్య మానవుడు. మనీషి అంటే ఉదాత్త మానవుడు. అలాంటి వారు 9 విషయాలలో గోప్యతను పాటించాలని శాస్త్రం చెబుతోంది. ఆవేమనగా 

1. మన ఆయుష్షు మనకు తెలియదు. ఒక వేళ సిద్ధులు, యోగుల వలన తెలిసినా ఆడంబరంగా చెప్పుకోకూడదు.

2. మన నగ నట్రా, పొలాలు, స్థలాలు, నిధి నిక్షేపాలు పరులకు చెప్పరాదు.  

3.ఇంటిగుట్టు గుట్టుగానే ఉంచాలి. రచ్చ చేయరాదు. 

4. తేలు, పాము, విశేష మంత్రాలతో రోగులకు సేవ చేయవచ్చు. కాని ఆ మంత్రం వెల్లడించరాదు.  

5. అలాగే దివ్యౌషథంతో రోగాలు నయం చేయవచ్చు కాని దాని మర్మం విప్పరాదు.  

6.కీలక వ్యక్తులతో చేసిన మంతనాలను, చర్చలను బట్టబయలు చేయరాదు. ప్రాణాలకే ముప్పు రావచ్చు.

7.మనం చేసిన దానం, ధర్మం, ఉపకృతి రెండో చేతికే తెలియకూడదంటారు.  దర్పంగా చెప్పుకోరాదు.  

8. మన ప్రతిభాపాటవాలకు గుర్తింపుగా జరిగిన గౌరవాన్ని, సన్మానాన్ని మనమే గొప్పగా చెప్పుకోకూడదు. పేలవంగా ఉంటుంది.  

9.మనకు ఇంటిలో గాని, ఆఫీస్ లోగాని, ఇతరత్రా గాని అవమానం ఎదురైతే సరిదిద్దుకోడానికి ప్రయత్నించాలే కాని, పది మందిలో అల్లరి చేసుకోరాదు.  మనమే  పలచబడిపోతాము.

ప్రతివారి జీవితంలో తారసపడే యీ 9 అంశాలలో గోప్యతను పాటించాలని భావము. లేకుంటే  సమస్యలు, కష్ట నష్టాలు, చింతలు, వంతలు ఎదురవుతాయి.