Devotional Waves

మనమంతా దివ్యమైన ఆత్మస్వరూపులమనే సహజ జ్ఞానం మనలోనే ఉన్నది. స్వార్థాన్ని విడిచి, ఫలితాలను గురించి భయాన్ని వదలి కార్యరంగంలోకి దుమికినప్పుడే ఘనతర కార్యసాధన జరుగుతుంది. పరిత్యాగం సంకుచితపు పరిధి నుండి విడుదలను ఇస్తుంది. మన సహజ స్వభావానికి వ్యతిరేకమైన వాటి నుండి తప్పిస్తుంది. పెను ప్రవాహం వచ్చినప్పుడు పిల్లకాలువలు తమ ఉనికిని కోల్పోతాయి కదా! అలాగే అల్ప విషయాలను తుడిచి వేయడం ద్వారా హృదయ వైశాల్యం విస్తరించి వీరోచిత కార్యాలకు ప్రేరణ కలుగుతుంది.

పవిత్రత అనే లేపనం ద్వారా లభించే ఉపశమనం ఈ ప్రపంచానికి అవసరమై ఉంది. ఒక మనిషి ఏ విశ్వాసాన్నీ అవలంబించకపోవచ్చు, కానీ అతను అన్ని విశ్వాసాల స్వరూపమై ఉండవచ్చు. ఆధ్యాత్మిక జీవనం ద్వారా పవిత్రత చేకూరుతుంది. ఆచరణాత్మక ఆధ్యాత్మిక జీవనాన్ని మనం అవలంభిస్తేనే ఇతరులకు ఆదర్శప్రాయంగా ఉండగలుగుతాము. మనలో అంతరంగ అన్వేషణ ప్రారంభమైనప్పుడే ఇతరుల అంతరంగంలోకి ప్రవేశించగలం. ఏది సంభవించినా సణుగుకోకుండా మన ఆదర్శం కోసం జీవితాన్ని అంకితం చేయాలి. "శుభం భూయాత్"