రామాయణంలో సుందరకాండకు ఆ పేరెలా వచ్చిందో దయచేసి తెల్పగలరు.

సమాధానం: 

రామాయణంలో బాలకాండ, అయోధ్యకాండ మొదలైనవి పేర్లు చదివితేనే వాటిల్లో విషయమేమిటో తెలిసిపోతుంది. కానీ సుందరకాండకు ఆ పేరెలా వచ్చిందో తెలుసుకోవాలంటే ఈ శ్లోకాలు చదవాలి.

సుందరే సుందరోరామః సుందరే సుందరీ కథా
సుందరే సుందరీ సీతా, సుందరే సుందరం వనం
సుందరే సందరః కపిః సుందరే సుందరం కావ్యం
సుందరే సుందరం మంత్రం సుందరే కిం న సుందరం?

శ్రీరాముని సౌందర్యం, మూర్తిమత్వం, సుందరకాండలోనే అధికంగా వర్ణింపబడ్డాయి. అందుకే అది సుందరకాండ.

సీతా సౌందర్యం, సౌశీల్యం ఎంత గొప్పవో దీనిలో నిరూపింపబడ్డాయి. అందుకే ఇది సుందరకాండ.

ఈ కాండంలో ప్రధానపాత్ర హనుమ. ఆయనకు సుందరుడు అనే పేరుంది. సౌందర్యం ఆకారంలో ఉండదు. ప్రాకారం(నడత)లో ఉంటుంది. సీతారాములకు ఆనందం కలిగించిన అందగాడు ఆంజనేయుడు.

సుందరకాండలో కథ బహుసుందరమైంది. కావ్య లక్షణాలలో ముఖ్యమైన శబ్ధం, అర్థం, రసం ఈ కాండలో సుందరంగా అమరి ఉన్నాయి. సుందరకాండ నవరసభరితం.

ఆధ్యాత్మికంగా భగవత్ (శ్రీరాముని) సౌందర్యాన్ని, జీవ (సీత) సౌందర్యాన్ని, ఆచార్య (హనుమ) సౌందర్యాన్ని వర్ణించిన కాండ సుందరకాండ. అది సర్వాంగ సుందరం.

సుందరకాండ మహిమాన్వితమైన మంత్రరాజం. అందమైన అశోకవనం సుందరకాండను శోభింపజేస్తుంది.

ఇక సుందరకాండలో సుందరం కానిది ఏముంది? అని పై శ్లోకాలకు అర్థం.

జైశ్రీహనుమాన్