ఆకారత్రయం అంటే ఏమిటి? ఇది ఎవరికి వర్తిస్తుంది?

సమాధానం:

 

లక్ష్మీదేవి ఆకారత్రయ సంపన్న. అనన్య శేషత్వం, అనన్య శరణత్వం, అనన్య భోగ్యత్వం ఈ ముడు లక్ష్మీదేవి లక్షణాలు.

అనన్య శేషత్వం అంటే అన్యులకు గాక భగవంతునికి మాత్రమే చెంది, ఆయన ఇష్టానికి తగినట్లుండడం.

అనన్య శరణత్వం అంటే భగవంతుడు తప్ప మరో శరణ (రక్షకం) ఆమెకు లేదు. ఆమెకు దిక్కు, దీపమూ అంతా ఆయనే.

అనన్య భోగ్యత్వం అంటే ఆమె భగవంతునిచే మాత్రమే భోగ్య అంటే అనుభవింపదగినది.

అయితే ఈ మూడు లక్షణాలు ఆమెకే ఉన్నాయా? మరెవరికీ లేవా? ఎందుకు లేవు? జీవులందరికీ ఈ మూడు లక్షణాలు ఉండాలి. లక్ష్మీదేవి కూడ మన జీవకోటిలోనిదే. అయినా మనకన్నా ఎంతో మిన్న ఎందువల్ల? ఆమెకు మనలో ఉండని మరో రెండు విశిష్ట లక్షణాలున్నాయి. అవే ఘటకత్వం, ప్రాప్యత్వం.

ఘటకత్వం అంటే జీవుల్ని భగవంతుడితో చేర్చే ఘటికురాలామె.

ప్రాప్యత్వం అంటే పరమాత్మతో సమానంగా ప్రాప్యమైనది. అంటే పొందతగినది.

ఆ దివ్య మిథునానికి (జంటకు) కైంకర్యం సమర్పించడమే మనకు మహాభాగ్యం. ఈ విధంగా జీవత్వ, ఘటకత్వం ప్రాప్యత్వములనే మూడు ఆకారాలు కలిగిన ఆమె అకార త్రయ సంపన్న.

ఆకారత్రయ సంపన్నాం అరవింద నివాసినీం
అశేష జగదీ శిత్రీం వందే వరద వల్లభామే

ఈ ధ్యాన శ్లోకంలో, శ్రీరంగం, తిరుమల, మేలుకోట, కాంచీపురములలో వేంచేసి ఉండే లక్ష్మీదేవి మనకు కనువిందు చేస్తుందని పెద్దల శ్రీసూక్తి.

శుభం భూయాత్